Valioso empate diante do líder.
Puntazo do sénior diante do líder da liga, que sabe a pouco tralo tanto do Negreira na derradeira xogada do encontro. Os nosos recibiron este domingo á S.D. Negreira para desputa-la xornada 24 do campeonato, que rematou cun empate a un gol. O gol do Bertamiráns chegou aos 15 minutos de partido despois dunha boa xogada entre Fabri, Adrián Arnejo, e Caeiro, quen se encargou de comeza-la xogada e rematala cun gran testarazo. O equipo seguiu tendo ocasións a pesares do dominio do equipo visitante, que foi quen de pornos contra as cordas reiteradas veces pero sen atopa-lo camiño do gol. Despois de máis de 90 minutos moi serios, nos que os nosos fixeron un gran desgaste, tras unha xogada a balón parado, a S.D. Negreira conseguiría o tanto que igualaba o marcador e que daría lugar ao 1-1 definitivo.
Temos por diante unha semana de esforzo para seguir mellorando de cara ao seguinte encontro, no cal visitamos ao C.D. Baio.